ALTERNATIEF SJÖTTEFEES - Vastelaovend in Zitterd 2018

Ga naar de inhoud

Hoofdmenu:

ALTERNATIEF SJÖTTEFEES
Geplaatsj: 31 Augustus 2017

Aafgeloupe sjoot Jacques Schrijen van De Kroenekrane zich pes Alternatieve Sjöttekeizer.
(foto: Sittard-geleen.nieuws.nl)

Aankommende zondig, 3 September, véngk weier ‘t Alternatief Sjöttefees plaatsj. ’t Feesterrein is net wie veurigjaor oppe Cour Colanus aan ’t Kirkepaad (vanaaf de Mert langs de Patesjkirk).
Alle deilnummende Alternatieve Sjötterieje, die veural besjaon oet Zittesje (Vastelaoves) vereiniginge en Zittesje kapelle verzamele zich vanaaf 13.00 oer op ‘t feesterrein en prizzenteiere zich vervolges bie ’t defile op ein ludieke maneier aan de zjurie en Keizer Jacques Schrijen van de Kroenekrane. Nao ‘t Defile trekke rondj 14.30 oer alle deilnummende alternatieve sjötterieje in de optoch door de bennesjtad. De optoch trek door de Ursulienehaof, euver de sjootsvelje nao de Begienehaofsjtraot en dan via de Lömmerichersjtraot, Mert en ‘t Kirkepaad trök nao ’t feesterrein.

Nao de optoch beginne op ’t feesterrein de sjeitwedsjrieje. Dit geit neit wie bie ein echte sjötterie op bölkes of eine houte vogel, mer op ’t Alternatief sjöttefees gebeurt dit door mit ein wendjbuks op eine tempexvogel te sjeite. ’t Sjteite is dan ouch ein sjport apaart, wo ouch ’t neudige gelök bie kump kieke. Daegeine dae ’t letste sjtökske van de vogel aafsjöte maag zich keuning nuime. In de eesjte sjeitronje wurt door alle alternatieve sjötterieje ongerling gesjaote om de Keuningstitel bènne hun ‘sjötterie’. Aansjloetend sjeite in de tweede sjeitronje alle keuninge taegen-ein om de Keizerstitel. De keuning dae dan de voogel aafsjöt maag zich ein jaor langk Alternatieve SjötteKeizer van Zitterd nuime.
De alternatieve sjötterie woo de Keizer lid van is haet de eer om volgendjaor ‘t Keizersfees op de zaoterdigavond veuraafgaond aan ’t Alternatief Sjöttefees te organizeiere.

Op zaoterdigaovend, 2 September is veuraafgaond aan ’t Alternatief Sjöttefees 't Keizesjfees. Dit Keizesjfees wurt dit jaor georganizeiert door de Kroenekrane ter eere van hunne Keizer Jacques Schrijen. Hae wis veurigjaor in de sjtreid tössje de keuninge 't letste sjtökske van de voogel aaf te sjeite. ’t Keizesjfees haet dit es motto 'Tirolerfest'.
In ein groot ‘festzelt’ op Cour Solanus kent jeederein Keizer Jacques filleseteiere en zörge DJ Dirndl en versjèllende artieste veur eine ‘bomben stimmung’. Wiejer kènt jeederein geneite van versjèllende typisch Dutsje versjnaperinge. ’t Festzelt’ äöpent om 20.00oer, de entree is gratis.

© WWW.VASTELAOVENDZITTERD.NL 2003-2017
© WWW.VASTELAOVENDZITTERD.NL 2003-2017
© WWW.VASTELAOVENDZITTERD.NL 2003-2017
Terug naar de inhoud | Terug naar het hoofdmenu