MASKE BEGRAVE - Vastelaovend in Zitterd 2018

Ga naar de inhoud

Hoofdmenu:

MASKE BEGRAVE
Geplaatsj: 27 Fibberwarie 2017

't Maske geit in de grontj.........Vastelaovend is gedaon  (foto: De Mander)

Daensdignach rondj middernach wurt ’t Maske begrave es teike dat de Vastelaovend veurbie is. Dit jaor gebeurd dat veur de 4x11de keer. De Carnavaleske rouwsjtoet wurt georganizeiert door Klup Neit kapot te kriege same mit Culturele vereiniging de Mander die ooit dit inisjatief veur höbbe genomme.

Al in de jaore dertig van de veurige eeuw begrouf De Mander ’t Maske en höbbe zie dees tradiese in 1974 opnuuj opgepak. Door de aafnummende belangsjtelling veur de Vastelaovesdaensdigaovend dreigde de tradiese van ’t Maske Begrave te verdwiene. De Zittesje jongere van de grop Neit Kepot te Kriege vonje dat dees tradiese neit mog verdwiene. De Mander haet toen besjlaote de organezase veur ein groot gedeilte aan dees vereiniginge eur te draage. Noe make KNKTK en De Mander ’t sjloetsjtök van de Zittesje Vastelaoves 6-daagse die kolderiek en hartversjeurend tegeliek is.

Om 23.11 oer vertek de rouwsjtoet vanaaf de houk Mert/Putsjtraot nao de top van de kogelvenger oppe Kolleberg, lede van Scouting Don Bosco zulle de rouwsjtoet verlichte mit fakkels. Presies om middernach begint de plechtige sirremonie in de Kogelvenger mit ellef saluutsjeut. Nao ein carnavaleske en hartversjeurende toesjraok door de Sirremoniemeister, wurt de rood, gael, gruin vaan gesjtreke en wurt onger massaal gebaok ‘t Maske begraave. Nao ’t zjwaorste deil van de sirremonie de menuut sjtilte wurt blees eine tropetis vanaaf de top van de Kolleberg zien letste sirrenaad euver de sjtad en klink oet hondere kaele ‘t Zitterd Allein.

Om ’t aafsjeid dragelikker te make waere alle deilnummesj aan ’t Maske begrave nao aafloup oetgeneudig veur ein kaffetaofel in Tapperie De Gats oppe Mert om ’t verdreit de verdrènke.
Veuraafgaond aan ’t Maske begrave maak ’t Maske vanaaf 19.11oer eine letste rondjgangk lang versjèllende kafees.

© WWW.VASTELAOVENDZITTERD.NL 2003-2017
© WWW.VASTELAOVENDZITTERD.NL 2003-2017
© WWW.VASTELAOVENDZITTERD.NL 2003-2017
Terug naar de inhoud | Terug naar het hoofdmenu